20 February 2026
Zomi Nam Ni thu ahong piankhiatzawh kum (78) acin hun sungin, Zogam sung leh, sak leh khang, sim leh mal, tuipi galkhat a om Zomi khempeuh tung ah, gam leh minam vang tawh, khat leh khat kithusimna, kizahtakna, kikhualna, kilemna leh ki-itna hong tung tahen, Zogam sung ah daihna leh bitna om henla, abukim, akipkho khantohna a om theihna dingin, Zomite in eima thu tawh Zogam Zingvai hawm theihna ni hong suak tahen ci in Zomi Political Coordination Council (ZPCC Pawlpi), Executive Committee pawl in thupha kong puak uh a, anungta Pasian tung ah thu ka ngen uhhi.
Zomi Nam Ni thu pen, Chin Special Division kici gamkee sung ah Zogam akigawm zawh Kha khat leh a lang acin hun, 1948 kum, February kha, Ni (18) pan (20) ni kikaal sung teng a, Falam khuapi ah akibawl, Chin Special Division ki-ukna leh kivaipuakzia tawh kisai taangpi thukikupna khawmpi panin ahong kipan ahi hi. Hih Falam khawmpi panin Chin Special Division gamkee sung ah, gam ki-ukna leh kivaipuakzia pen taangpi thuneihna siksan in khun dingin mipi thukimna tawh kikipsak zo ahih manin, February (20) ni pen Zomi Nam Ni in akiciamteh ahi hi. Zogam a kipan, Chin Special Division gamkee sung ah, mipi thuneihna (Democracy) zahtakna, eima thute eima’n vaihawm theihna (Self Determination) thuneihna leh tualsuak minamte (Nationalities or Ethnic/ Indigenous People) dinmun kipsakna cih minam thumeilette akikhung zo suak ahih manin, Zomi Nam Ni pen Zomite ading in a thupi mahmah, nilian ni khat ahi hi. Tuamah bangin, tua hunlai a Chin Special Division sung a om minam tuamtuamte, adiak in, British kumpi ukna leh ciaptehna sung a Chin Hill gamkuam pan Panglong khawmpi akah, Ukpi thumte’ gam thumteng pan minam thumteng ading in, February (20) pen, amau minam niciat hong suak hi.
A khang, a khang in, Kawl Gam sung ah minam khatin, mimal atampen hihna leh thagum hatna suangin ukna buluh tawntung uh a, mualtung minamte hong nuaisiah uh ahih manin, Zomite in Zomi Nam Ni tawh hong tonkhawm thuneihnate kingahkim zonailo hi. Tuaban ah, abeisa hun sungin, Zogam makaite in, Zomi Nam Ni tawh ahong piangkhia Democracy leh Self Determination thuneihnate, minam picing khat hihna tawh tualsuak minamte dinmun (Identity) leh thuneihnate (the Rights of Indigenous Peoples), Zogam sung ah picing takin ataksuak, anuntak theihna dingin thumeilette (Policies) leh kivaipuakziate (Governance) nakhung zolo uh ahih manin, tuni ciangdong, Zomi Nam Ni thubulpite alawhcing nailo hong suak hi.
Tua ahih manin, 2019 kum, Zomi Nam Ni hun sung a, Kuala Lumpur khuapi ah akibawl, Leitungbup Zomite Minam Khawmpi in akipsak, Zogam Mabante siksan in akikhung Zogam Charter pen, Zogam leh Zomi buppi ading in, Zomi Nam Ni ahong piankhiatna thubulpi atangtun theihna ding Minam Maban thupipen hita hi. Kum (78) acingkhin Zomi Nam Ni hong piankhiatna thubulpite in, Zomite ading in, Zogam Charter akisap peelmawhna leh a thupina hong kipsak semsem hi.
Tuni, kum (78) acing Zomi Nam Ni in, Zomi buppi in ZPCC Pawlpi tawh khut kilen in, Zogam Charter sung a kikhung Zogam leh Zomi thu taangkonate pom a, Zogam Ngimna Bulpite leh Thumeilette ataksuak zawhna dingin Zogam Mabante ah ma pangkhawm ni ci in, itna leh zahtakna tawh hong kihanthawn hi.
Executive Committee
Zomi Political Coordination Council
Tedim, Zogam
